Komunikadu Imprensa ofisial ba Tour de Timor 2018
27 Julho 2018
Tinan ida ne’e siklista sira sei asesu ba hahán di’ak no midar husi Timor ne’ebé oferese husi Timor oan na’in rua nu’udar na’in ba Dilicious no Talho Moris ne’ebé sai ona hanesan parseiru ofisial ba Tour de Timor 2018. Dilicious hanesan restaurante ida ne’ebé harii husi Timor-oan Sr. Cesar Trinito Freitas Gaio, nune’e mós Talho Moris hanesan loja na’an ne’ebé harii no ninia na’in mak Carlos Sequeira.
Tanba involve ona iha eventu ida ne’e dezde 2017, tinan ida ne’e negósiu rua ne’e bele estabelese no promove sira nia emblema ka naran ba ema internasionál no Timor-oan sira ne’ebé hamlaha tanba partisipa iha eventu ne’e.
Ko’alia kona-ba envolvimentu iha tinan ida ne’e Sr. Gaio hateten katak “Tinan kotuk sai hanesan introdusaun real oinsá atu serve hahán ba Tour de Timor. Iha tinan kotuk ekipa Dilicious koordena ema sira ne’ebé te’in no ajuda iha dapur hamutuk liu ema na’in 100 husi Dili, Aileu no Maliana atu prepara hahán ba eventu ne’e. Tinan ida ne’e ema barak husi ekipa hanesan, sei fila mai hodi bele ajuda ami atu dezenvolve bazeia ba esperiénsia tinan kotuk. Ha’u orgulho servisu hamutuk ho ha’u nia ekipa no envolve dala ida tan.” Nain ba Dilicious ne’e hatutan tan katak “tinan ida ne’e chefs foun balun sei mai servisu hamutuk ho ami – ami halo hela planu menu di’ak ho mistura hahán Timor, Asia no hahán internasionál. Hanesan mós tinan kotuk dapur Tour de Timor sei kontinua oferese hahán durante oras 16 loron-loron- hodi asegura hahán ne’ebé seguru no prontu ba ema sira ne’ebé hein atu han.
Durante loron lima ba Tour de Timor hahán liu 6000 sei oferese ba siklista, voluntáriu no staff apoiu sira. Tinan ida ne’e sei fó atensaun espesiál atu sosa sasán lokál hanesan, bife, ai fuan no modo.
“Ko’alia kona ba bife no Tour de Timor, Talho Moris mak liña dahuluk atu involve.” Carlos Sequeira dehan, “Razaun prinsipál mak nu’udar loja ba na’an premium iha Timor-Leste, Talho Moris rekoñese oportunidade ne’ebé Tour de Timor fornese atu hatudu ami nia servisu no kapasidade. Agora daudaun ami halo na’an maran balun husi karau di’ak sira iha Timor ba korrida ida ne’e. Ami sei halo sosis espesiál, steak oi-oin ne’ebé sei tempra ho ami nia saus espesiál ne’ebé hili husi na’an karau, fó tulun chefs sira atu prepara na’an lalar, da’an, barbecue ne’ebé hotu-hotu uza na’an karau di’ak husi Timor.”
Portavós Tour de Timor, Sr. Johnny Guteres konfirma katak: “Tinan ida ne’e ami halo esforsu espesiál atu hola no promove produtu lokál sekarik posivel. Iha semana hirak tuir mai, ami planu atu anunsia parseria estratéjiku nian liu tan hodi asegura katak Tour de Timor suporta ekonomia lokál. Ami mós iha preokupasaun boot atu hamenus ami nia impaktu ba ambiente – agora daudaun ami halo hela diskusaun ho produser filtru be nian ne’ebé sei ajuda ami atu redús ami nia nesesidade ba be ho plástiku iha fatin akampamentu no iha dalan ba eventu ida ne’e.
Espera katak kuaze siklista na’in 150 mak sei halai hamutuk liu husi foho sira iha rejiaun sentrál Timor-Leste nian. Kompetisaun ne’e sei hala’o entre loron 4 no 8 fulan Setembru tinan ida ne’e. Alende ida ne’e, Halai ba Dame (halai ho distánsia badak no la’ós kompetisaun ne’ebé sei involve estudante sira no partisipante Tour de Timor) sei hala’o iha Domingo, loron 2 de Setembru iha kapitál Dili.
Vizita website ofisial: www.tourdetimor.com atu hetan informasaun barak liu tan.
Comments are closed.