NCCTRC (National Critical Care & Trauma Response Centre) dala ida tan sei fó apoiu ba Tour de Timor ne’ebé sai ona hanesan eventu annual turizmu ba Timor-Leste ho nivel internasionál. NCCTRC ne’ebé hetan fundus husi Guvernu Australia liu husi departamentu saúde iha Darwin, sei ezerse atu destaka ekipamentu no pesoál sira iha terenu hodi fornese médiku no primeiru sokorru ba kompetisaun bisikleta foho ne’ebé koñesidu tebes iha Ázia. Dezde lansamentu ba eventu importante ida ne’e, NCCTRC fornese ona asisténsia klínika oi-oin hodi asegura nafatin seguru ba partisipante no ekipa organizadór sira, sira mós uza esperiénsia ida ne’e hanesan oportunidade importante atu halo ezersisiu ba AUSMAT.Sekretariu estadu Juventude no desportu, Senor Nelio Isaac Sarmento konfirma notísia ida ne’e hodi hateten katak: “ NCCTRC simu ona pedidu ofisial husi Governu Timor-Leste atu kontinua fó nafatin asisténsia importante ida ne’e ba Tour de Timor. Ida ne’e hanesan parseria ida ne’ebé kleur ona ho Tour de Timor ne’ebé sei selebra ninia aniversáriu ba dala sanulu iha tinan ida ne’e. Semana hirak tuir mai NCCTRC sei estabelese no prepara ninia envolvimentu, hodi hasoru doutór no ekipa apoiu emerjénsia husi Timor atu servisu hamutuk iha ekipa médiku ofisial. Ekipa ne’e sei hamutuk hodi asegura katak partisipante hotu-hotu hetan asesu ba asisténsia médiku nivel mundiál atu siklista sira hotu bele partisipa ho seguru no hatudu sira nia talentu ho di’ak”.
Husi Darwin, Diretór Eksekutivu NCCTRC Professor Len Notaras AM konfirma partisipasaun husi ninia ekipa ba eventu ne’e iha tinan ida ne’e. Nia hatutan tan katak:“Eventu ne’e sei hetan ekipa treinadu husi NCCTRC husi parte hotu iha Australia atu fó asisténsia médiku ba kompetisaun, hodi kontinua hametin relasaun ne’ebé metin ba beibeik ho Ministériu da Saúde no ekipa emerjénsia husi Timor-Leste hodi fó apoiu ba eventu koñesidu ida ne’e”.
Espera katak kuaze siklista na’in 150 mak sei halai hamutuk liu husi foho sira iha rejiaun sentrál Timor-Leste nian. Kompetisaun ne’e sei hala’o entre loron 4 no 8 fulan Setembru tinan ida ne’e. Alende ida ne’e, Halai ba Dame (halai ho distánsia badak no la’ós kompetisaun ne’ebé sei involve estudante sira no partisipante Tour de Timor) sei hala’o iha Domingu, loron 2 de Setembru iha kapitál Dili.)
Vizita website ofisial: www.tourdetimor.com atu hetan informasaun barak liu tan.
Comments are closed.