Tour de Timor 2018 marka ninia aniversáriu ba tinan sanulu

Komunikasaun ba Imprensa kona ba Tour de Timor 2018

Fulan Júhlo 2018

Hela de’it semana neen atu hahú kompetisaun kurida bisikleta ne’ebé koñesidu iha Asia, governu Timor-Leste ho organizadór Tour de Timor aselera ona preparasaun ho eskala boot atu simu siklista, voluntáriu no media sira ba tinan ida ne’e atu asegura katak kompetisaun ba tinan ida ne’e bele forma ona fundasaun ida ne’ebé firme ba kompetisaun sira iha tinan hirak tuir mai.

Sekretáriu Estadu Juventude no Desportu, Nelio Isaac Sarmento ho kontente anunsia katak: “Lansamentu video ofisial ba eventu tinan ida ne’e kuaze ema na’in rihun sanula resin rua (15.000) mak hare tiha ona iha loron rua nia laran de’it, ne’e hatudu indikasaun boot kona ba ema nia interese makas ba Tour de Timor. Atu bele iha preparasaun ne’ebé di’ak ba eventu tinan ida ne’e, Sekretáriu Estadu sei halo enkontru semanál ho parseiru governu sira hanesan PNTL no primeiru sokorru sira husi ministériu de saúde”. Nia hatutan tan katak: “Ho servisu hamutuk ho Federasaun Siklizmu no organizadór Tour de Timor ami sei asegura atu siklista Timor-oan barak mak bele partisipa no reprezenta nasaun Timor-Leste iha eventu tinan ida ne’e”.

Organizadór Tour de Timor sei halo esplikasaun badak ba siklista sira iha Darwin no Dili antes eventu ne’e hahú atu bele hato’o informasaun adisional balun ba partisipante sira. Tinan ida ne’e ita espera katak siklista na’in 150 mak sei partisipa iha kompetisaun ho etapa oi-oin durante loron 5 nia laran ne’ebé sei hala’o entre loron 4 to’o loron 8 fulan Setembru tinan ida ne’e.

Bainhira husu kona ba estrada ne’ebé siklista sira sei liu, Ofisial ligasaun ba media husi Tour de Timor 2018, senor Johny Guterres hateten katak: “Rute no etapa sira ba tinan ida ne’e deside ona bazeia ba rezultadu pragmatizmu. Perkursu ba tinan ida ne’e sei sentraliza iha Tour de Timor nia fatin akampamentu iha Aileu. Ida ne’e sei rezulta etapa sira ne’ebé badak liu kompara ho tinan hirak liu ba, maski nune’e sei nafatin sa’e foho makaas (± metru 10.000) hodi hatudu katak Tour de Timor sai nafatin hanesan kompetisaun bisikleta foho ne’ebé nakonu ho dezafiu iha mundu hanesan hatudu tiha ona iha tinan hirak liu ba”. Ko’alia kona ba fatin akampamentu iha Aileu nia hatutan tan katak: “Fatin akampamentu sei aumenta tan fasilidade saneamentu no dapur nian”.

Espera katak kuaze siklista na’in 150 mak sei halai hamutuk liu husi foho sira iha rejiaun sentrál Timor-Leste nian. Kompetisaun ne’e sei hala’o entre loron 4 no 8 fulan Setembru tinan ida ne’e. Alende ida ne’e, Halai ba Dame (halai ho distánsia badak no la’ós kompetisaun ne’ebé sei involve estudante sira no partisipante Tour de Timor) sei hala’o iha Sábadu, loron 2 de Setembru iha kapitál Dili.)

Vizita website ofisial: www.tourdetimor.com  atu hetan informasaun barak liu tan.

 Atu hetan informasaun klaru kontaktu : info@tourdetimor.com